تكلفة تصديق الاوراق من السفارة الالمانية

تكلفة تصديق الاوراق من السفارة الالمانية

لو انت لسة اول مرة تقوم ب تصديق الاوراق من السفارة الالمانية

او هتطلع خمس نسخ طبق الاصل

فلازم صاحب الشأن هو بنفسه اللى يوثق و لو مش موجود فلازم صاحب الشأن يملى الورقة

اللى فى اخر المقال و يمضى عليها و اللى هيروح يوثقلو ف ياخدها معاه

و ياخد صورة جواز السفر

صاحب الورق و كمان صفحة الامضاء فى الباسبور ولازم الامضاءات تكون زى بعض

 يعنى الصورة اللى تحت دى هتبقا 6 نسخ نسخة للاصل

و خمس نسخ لطبق الاصل و هقول ليه لازم خمس نسخ

 

الورقة ممكن صاحب المستندات يبعتهالك ميل.

 تطبعها عادى مش لازم اصل الورقة يعنى  لو صاحب الشأن هو اللى هيوثق بنفسه فالموظفة هتقولك املى الورقة دى و سلمهالى دلوقتى و انت بتسلم الورق عشان توثق اصل و طبق اصل فلازم لازم تقول للسفارة اسم الخمس جامعات اللى هتقدم عليها اة والله يا اما مش هتوثق ببلاش و كل نسخة من الورقة اللى فى البوست بيبقا مكتوب فيها بيانات الجامعة و كدة لو محجزتش ميعاد فى السفارة فعادى سيب الخانة فاضية

 

النسخة الاصلية للورق. 

اللى هتوثقه مش هيبقا مكتوب فى ختم التوثيق اسم جامعة بس فى نسخ طبق الاصل هيبقا مكتوب ان النسخة دى متوجهة لجامعة كذة زى اللى فى الصورة اللى تحت

 

لو جامعة تقديمها عبر اليونى اسيست.

ف اكتب فى نسخة من الورق ان الورق دة متوجه لليونى اسيست وبلاش تكتب اسم جامعة تقديمها عبر اليونى اسيست و استغل النسخ التانية فى اى جامعة تقديمها مش يونى اسيست

 

قبل ما تروح توثق فى السفارة الالمانية.

حاول تعرف اسم الجامعات اللى هتقدم عليها عشان تكتب اسمها و متقولش اى اسم جامعة وخلاص والله اعلم لو كتبت اسم جامعة و بعت الورق لجامعة مختلفة ف ايه اللى هيحصل. 

 

كل طالب له خمس نسخ طبق الاصل.

ركزوا يا جامعة و اعرفوا يعنى ايه خمس نسخ طبق اصل مثلا انت طلعت ثانوية عامة و بيان درجات الجامعة و شهادة تخرج ف انت ليك خمس نسخ طبق الاصل من كل شهادة عايز بقا تطلع الخمس نسخ طبق الاصل للثانوية بس او للجامعة بس او الاتنين مع بعض ف براحتك

 

نسخ طبق الاصل.

بيبقا كل الورق بتاعك من اى شهادة متدبس مع بعضه و بيبقا ختم واحد ع الدبوس و بكدة تعتبر نسخة واحدة المهم ان مينفعش يبقا معاك اكتر من خمس نسخ طبق الاصل ولو عايز تطلع نسخة زيادة ف بتدفع فلوس لو قولت مثلا والله فيه ورقة نسيتها و موثقتهاش فالموظفين هيقولوا ليك اومال انت قدمت ع الجامعة ازاى و المفروض ان انت عارف متطلبات كل جامعة هتقدم عليها و ع اساس كدة جيت توثق الخمس نسخ وكدة انت مالكش نسخ طبق اصل و هتدفع فلوس

 

مش لازم تطلع الخمس نسخ طبق الاصل.

مرة واحدة ممكن تروح مثلا تطلع نسختين بس و تقول اسم جامعتين عشان لو احتجت ورق زيادة و عايز تطلع عليه طبق الاصل فبيبقا معاك لسا – نسخ مش لازم الخمس نسخ طبق الاصل يبقوا زى بعض فعشان كدة يفضل متطلعش الخمسة مرة واحدة و لما تيجى تراسل جامعات تانية ف تروح تطلع النسخ الباقية لو موظفة قالتلك لا لازم خمسة مرة واحدة فقولها انا مراسلتش غير اتنين و مينفعش اكتب اسم جامعات و انا لسا مراسلتهاش

 

الايلتس و جوتة.

مش لازم تصديق من السفارة الالمانية لو الشهادة معاك من الاول فتقدر تصدقها توثقها ببلاش مع الثانوية و الجامعة فى بوست التوثيق الاصلى مكتوب ازاى توثقها من جوتة

 

فيه اكتر من واحد بيوثق ورق الجامعة و الثانوية.

بيخلص الخمس نسخ و بيروح للسفارة و الموظفين بيقولوا لازم تدفع 330 ج عشان توثق لو عايز تبعت نسخة اصلية للجامعة او اليونى اسيست وعايز توفر و تطلع نسخة اصلية ف روح معهد جوتة و طلع نسخة ب 75 ج و كإنها اصلية و مختومة من جوتة الايلتس معرفش الحقيقة بتطلع نسخة من المعهد ازاى 

 

لو انت طلعت الخمس نسخ طبق الاصل.

و عايز تطلع نسخة سادسة فالنسخة لحد 10 ورقات ب 330 ج  ومش لازم تملى الورقة اللى فيها اسم جامعة والكلام دة ومش هيكتبوا عليها اسم جامعة مادام هتدفع وممكن اى حد يوثقلك عادى من غير ما تعمل خطوة الورقة دى

 

 بالنسبة لخريجى الطب او الصيدلة او الطب البيطرى العلاج الطبيعى.

لو انت متخرج من طب بشرى – اسنان – بيطرى – صيدلة – علاج طبيعى و روحت للسفارة و قولتلهم عايز اوثق بغرض الدراسة و هروح ماستر فهيقولوا لا و هتدفع فلوس حاول معاهم مرة و اتنين و تلاتة دة لو انت فعلا رايح دراسة وماستر الموظفين هيقولوا ليك هاتلنا قبول جامعة ف الكلام دة غير منطقى الحقيقة لان مشوفتش جامعة بتدى قبول الا لو الورق متوثق ممكن تلاقى جامعات مبتطلبش توثيق ف كل اللى هتقدر تعمله ان انت هتراسل الجامعة و هتقولهم والله الورق عايزينه متوثقة سفارة والا لا و السفارة عايزة تتأكد و ساعتها ممكن توثق ببلاش و ممكن برضه يرفضوا  لو انت بتدرس لسا و متخرجتش فالكلام دة مش هيتطبق عليك

 

لكل قاعدة استثناءات ياريت الاستثناء متثبتهوش و تقولوا عليه قاعدة

مثلا دلوقتى لغوا فكرة ان اى حد من برا القاهرة ياخد الورق فى نفس اليوم لان العدد كتر والله اعلم هيرجعوها تانى والا لاء 

– كان قبل كدة ممكن يوثقوا حاجات مش مطلوبة و بيعدوها مع ناس بس دلوقتى الله اعلم هيوافقوا والا لا

– موظفين قسم التوثيق مالهمش اى ذنب فى التعليمات و التغييرات الجديدة دى زى ما بنقول ان التعليمات جاية من فوق

– السفارة الالمانية فى القاهرة تقريبا هى الوحيدة اللى بتوثق ببلاش للطلاب بعكس السفارات الالمانية فى البلاد العربية

تقريبا اى سفارة فى مصر بتوثق بفلوس حتى لو طالب و مثلا سفارة النمسا

 

عدد المتقدمين ل تصديق الاوراق من السفارة الالمانية سنة 2017

فيه 20 الف توثيق من مصر من السفارة الالمانية فى مصر تخيلوا

من اصل 80 الف توثيق على مستوى العالم من السفارات الالمانية