مدينة مينيابوليس ولاية مينيسوتا

محطة انتظار النورث ستار – مينيابوليس

مدينة مينيابوليس ولاية مينيسوتا

سنتحدث عن كل شئ خاص ب مدينة مينيابوليس ولاية مينيسوتا لو حد حابب يجى يبدأ حياة هنا كل شئ هنا عن تجربة شخصية و هركز على الجو العام و المعيشه و المرتبات و الوظائف فى مدينة مينيابوليس ولاية مينيسوتا بالولايات المتحدة الامريكية

نبدأ على بركه الله

اول شئ انا عايش فى ولاية مينيسوتا بمدينه مينيابوليس بامريكا

محلوظه مدينة مينيابوليس احد مدن ال twin cities

 

معلومات عن مدينة مينيابوليس

مدينة مينيابوليس من اكبر مدن ولاية مينيسوتا و بتقع جنب مدينة سانت بول و الاتنين مع بعض اسمهم ال twin cities و هى واقعة على ضفة نهر المسيسيبى

Booking.com

كورة القدم الامريكية و الرياضة عموما هنا هنا فى ولاية مينيابوليس من اهم شىء يهتمون به و عشان برضو هنا موجود الملعب الخاص بفريق مينيسوتا فايكينجز

بمدينه مينيابوليس بها بحيرات كتيرة
و عموما ولاية مينيسوتا تعتبر اكبر ولاية فى الولايات المتحدة الامريكية بها بحيرات ويقال عنها ولاية العشر الاف بحيرة
و مدينة مينيابوليس بهامنتزهات و حدائق كتيره جدا انا مصور بهاحوالى 1000 صوره بس للازهار و الاشجار والحدائق الى موجوده هبقى انزلهم بعدين

 

 

الجو العام فى مدينة مينيابوليس

طبعا مينيابوليس فى مينيسوتا و مينيسوتا عباره عن كره تلج
فالجو اغلب الوقت برد جدا و جليد و فى الصيف لو جه يعنى بيبقى جو كويس و حلو متعتمدش ع الشمس كتير عشان غالبا هتشوفها ف المناسبات بس الطرق كويسه للقياده و بيتم التجديد بهاكتير البنيه بتاعت المدينه كويسه جدا و فى مطاعم كتير و اسواق و مولات و في نسبه مسلمين الى حد ما قليله و اغلبهم عرب جاين يدرسوا ف الجامعات الى هنا

 

 

المواصلات فى مدينة مينيابوليس

السؤال الابدى الى اى حد رايح مدينه جديده فى امريكا هل انا محتاج عربيه ؟
الا لو عايش فى نيويورك سيتى بقى فالموضوع حلو
المهم خلينى اديلك مفجأه جامده جدا
احنا فى مينيابولييس عندنا مترو اه و الله عندنا مترو و بيروح غالبا كل حته هنا
المواصلات فى مينيابوليس كويسه و متوفره بكل الانواع
فى مترو و فى باص و فى نورث ستار (زى القطر كده)
يعنى غالبا مش محتاج عربيه الا لو حابب تلف
ثانيا الى معاهم عربيه هيسأل اسعااااار الباركينج يا عم السيد
لالالا متخفش من الكلام ده يا راجل الباركينج ببلااش

 

 

الزيارات مدينة مينيابوليس

بص يا باشا لو هتيجى فى الشتا تزور المدينه و كنت بتحب البرد فالموضوع هيبقى حلو جدا لو تغاضينا عن اوقات الى بيبقى بهاالشتا قاسى شوية لو مش بتحب البرد يبقى متجيش فى الشتا عشان هتكره حياتك حرفيا المدينه فى اماكن بالهبل عشان تزورها يعنى مش هتمل خالص خالص و كمان فى فنادق كتيره و بأسعار مختلفه و ف مناطق كويسه و اوقات بتوفر خرائط للناس الجديده و كمان الناس هنا حلوين و كويسين و بيحبوا يساعدوا

 

 

الامان في ولاية مينيسوتا

الامان هنا احسن شئ موجود مينيسوتا عموما من أأمن الولايات الموجوده فى امريكا و مينيابوليس مختلفتش كتير عن الولاية معدلات الامان عاليه جدا

 

 

التعليم في مدينة مينيابوليس

مستوى المدارس و التعليم عموما عاليه هنا و بكفائه كويسه جدا يعنى علم اولادك او انت ادرس هنا و انت متطمن

 

 

العمل و الرواتب فى مدينة مينيابوليس

بص يا باشا و ركز كويس فى الكلام ده
الشغل هنا موجود فى اى مجال انت حابه زيها زى المدن الامريكيه المختلفه شغله واحده هنا تكفيك كويس اوى فى المعيشه و مفيش ادنى مشكله
الرواتب السنوية متوسطها 61 الف دولار هنا فى المدينه و ده طبعا ع حسب خبرتك و الكلام ده عن المتوسط

سعر الساعه هنا في ولاية مينيسوتا 10 دولار تمام بس بص ع الخبر المفرح من فتره كده كان اتعمل فوت عندنا عشان يعلوا المرتبات شويه لان هنا المعيشه ف مدينة مينيابولس دى نوعا ما غاليه شوية المهم تم التصويت عليها و ان يكون سعر الساعه 15 دولار ايوووووه فعلا 15 دولار و تم فعلا بنجاح الموافقه عليها و هيتم التطبيق السنوى لرفع سعر الساعه لحد 2024 تكون وصلت ل 15 دولار للساعه كحد ادنى للاجور و الموضوع ده كويس جدا جدا جدا

متوسط المرتبات الشهريه هنا بعد الضريبه هى 3400 دولار

 

السكن فى مدينة مينيابوليس

بص لو هتشترى فربنا معاك بقى لان الشراء هنا غالى نوعا ما و بيبدأ للاستوديو الصغير من اول 70 الف دولار و لحد البيوت الكبيره الى بتروح ل 700 الف دولار
و طبعا بيختلف من مكان لاخر و اسعار السكن بتختلف من مكان للتانى
انا ساكن سكن مشترك فى داون تاون و بدفع 420 دولار شهريا و موجودين 5 ف الشقه مشتركه الجنسين
سعر السكن الفردى فى ستوديو ف مدينة مينيابوليس من حوالى 850 ل 1300 دولار شهريا و ده للاستوديو
وده طبعا زى ما قولت لو بعيده عن الداون تاون بتبقى ارخص عموما اغلى ايجار عندنا مبيعديش ال 2500 شهريا

 

اسعار السكن للشراء العقارات مدينة مينيابوليس

عموما لو فى وسط المدينه فالسعر للمتر المربع 2500
لو بعيد عن وسط المدينه فالسعر للمتر المربع1400

 

اسعار المأكولات و المشروبات فى مدينة مينيابوليس

اى مطعم عادى الوجبه فيه بتبدأ من 15 دولار
مطعم متوسط الوجبه ب 25 دولار لشخص واحد
اى وجبات سريعه كنتاكى ماك و الحجات دى بتبدأ من 7 دولار
القهوة حوالى 4 دولار
البيبسى 1.76 دولار
المية 1.43 دولار

لتر اللبن 74 سنت
500 جرام عيش ب 3 دولار
كيلو الرز الابيض ب 5.40 دولار
12 بيضه عاديه ب 2 دولار
سعر الجبنه المحليه هنا ب 11.30 دولار
كيلو صدور الفراخ بدون عظم او جلد ب 10.50 دولار
كيلو اللحوم الحمراء ب 13.70 دولار
كيلو التفاح ب 5 دولار
كيلو الموز ب 1.40 دولار
كيلو البرتقال ب 6.50 دولار
كيلو الطماطم ب 5.10 دولار
كيلو البطاطس العاديه ب 2.25 دولار
كيلو البصل الاحمر ب 2.60 دولار
رأس التومه الواحده ب 1.70 دولار
باكت السجاير ب 9 دولار

 

الانتقالات والمواصلات ولاية مينيسوتا

الانتقالات والمواصلات ولاية مينيسوتا التذكره ف المواصلات العامه ب 2 دولار
اشتراك المواصلات الشهرى فى المتوسط 60 دولار
سعر التاكسى البدايه بتاعته ب 5 دولار و اى كيلو بعد كده ب 1.50 دولار
اسعار العربيات الجديده تبدأ من 19 الف

 

الخدمات بولاية مينيسوتا

الخدمات بولاية مينيسوتا اسعار الكهربا و الغاز و الماية و الزباله و التدفئه شهريا لشقه 90 متر حوالى 135 دولار
دقيقه الموبايل بدون اى باقات او شئ ب 10 سنت
النت عندنا بسرعه 60 ميجا سواء كابل او واى فاى او موبايل و بدون اى حدود للتحميل ب 50 دولار
تذكره السينما 10 دولار
الجيم ب 45 دولار
اسعار الحضانات الخاصه للاطفال شهريا 1280 دولار
اسعار المدارسه الانترناشونال الخاصه سنويا 18 الف دولار

 

اسعار الملابس ولاية مينيسوتا

سعر الملابس في ولاية مينيسوتا من 40 دولار للماركات فى البناطيل
و من 30 دولار للماركات فى الفساتين
و من 70 دولار للماركات ف الكوتشى
و من 100 دولار للماركات ف الاحذيه الجلد

اسعار الاكل و الحجات دى بتختلف من سوبر ماركت للتانى مثلا زى والمارت و اليدى والحجات دى

و دى كل المعلومات الممكنه عن مدينة مينيابوليس احد مدن التوين سيتيز ولاية مينيسوتا

 

اقرأ ايضا مقالات قد تهمك نرشحها لك

تكلفة المعيشة في سياتل واشنطن المعيشة

تامين صحي للولادة في امريكا us insurance

افضل ولايات امريكا للعائلات

الحياة في امريكا للمهاجرين الجدد

الحياة في كندا للمهاجرين مقارنة مع امريكا

سولت ليك سيتى مدينة الثلج والحر 

 

 

فكرتين عن“مدينة مينيابوليس ولاية مينيسوتا”

  1. Pingback: لم الشمل فى امريكا المرحلة الاولى والثانية - تجوال

  2. Pingback: افضل باقة انترنت في امريكا - تجوال

تم إقفال التعليقات.